Pue paecer raro que, dempués de tantos años viviendo en Madrid, nunca se me presentara la ocasión de recibir a los mios padres y a la mio hermana al empar. Como la mio madre y el mio padre siguen trabayando y la mio hermana anda metida de llenu nel so doctoráu, cenciellamente nun pasara. Bueno, nun pasara hasta agora.

Tres recoyelos nel aeropuertu, los cuatro apretámonos como sardines nel mio pisu d’una sola habitación, y asina empezó la prueba definitiva de la nuesa dinámica familiar. Cedí la mio cama a los mios padres y la mio hermana y yo quedamos nel sofá cama. Al final llevámoslo bastante bien, gracies en gran parte a la política restrictiva d’equipaxe de Ryanair: naide tuvo la oportunidá de llenar la mio casa de cachivaches que estorbaren…

Bromes aparte, pasámoslo de cine. Pasamos los díes comiendo, bebiendo y callejeando pela ciudá en mou familiar. Quedamos pel mio barriu, pero tamién fuimos a esplorar zones con más caché. Ente los momentos destacaos, una cena italiana nel barriu pijín de Salamanca y una vuelta en bici hasta’l ríu pa ver l’alborada cola mio hermana. Nun me levantara tan ceo dende’l desfase horariu que arrastré tres el mio viaxe a Xapón, anque lo arreglé ensin problema con una bona siesta…

Empeñáu en que toos disfrutaren, aseguréme de cumplir colos gustos de cada ún: el Mercáu de San Miguel pa la mio madre, la pizzería NAP pa la mio hermana y cualesquier cais pa’l mio padre. Él siempres ye quien a atopar rincones y detalles interesantes que fotografiar nos llugares más anodinos.

A pesar del aire fresco de marzu y d’unos cielos nubosos que amenazaben con fastidiamos los planes, tener a tola familia xunta durante unos díes foi un auténticu placer. Pue que yo seya la oveya prieta por marchar a miles de quilómetros, pero momentos como estos, nos que podemos xuntanos y facer dalgo distinto, faen que la distancia mereza la pena. Ojalá vuelvan pronto los trés.