El problema de ser inmigrante y tener amigos inmigrantes ye que nengún de nós queda quietu. Kevin yera un español n’Inglaterra cuando nos conocimos, pero depués volvió pa España. Yo fixi lo mesmo unos pocos meses depués, pero al poco Kevin marchó a vivir a los Estaos Xuníos. Yo quedéme per tierres españoles na so ausencia, levantando’l país.

Como Kevin nun pue volver a casa de siguío, la oportunidá que solemos tener pa vernos ye’l mio viaxe añal a América del Norte. A partir d’esti añu, suspendí esi viaxe: en parte poles secueles del accidente, en parte pol clima políticu nos EE. UU.

Entós, cuando Kevin llamóme pa dicir que diba tar n’Asturies un par de selmanes en branu, nun tardé en pillar un AVE pa dir velo. El tiempu con Kevin ye siempre tiempu bien aprovecháu, y más entá cuando vien a España, porque apúntase ensin dulda a cualquier cosa que-y paez divertida. Por eso, comimos como reis, pasámonos cola sidra y echamos la nueche entera nuna fiesta de prau. El momentu cume d’esa nueche foi velo arrastrar una silla de plásticu ente tola xente amontonada pa que yo pudiera sentame y descansar la rodía en mediu la fiesta. Qué tipu.

Pero nun vi solo a Kevin. Tamién nos xuntamos con Raquel y Joel, a quien conocí per primer vegada na risotada que foi’l Descensu del Sella. Tocaba celebrar, porque acababen de mercar un terrén pa construyir xuntos una casa. Lleváronnos a la so parcela pa facer un picoteu, tomar más sidra y comer unes costielles de la parrilla d’al llau. Fueron les meyores que probé na mio vida, y sabíen meyor entá pola compañía tan bona y el paisaxe tan guapu.

A esti pasu, seguramente nun faiga falta volver a dicir lo muncho que quiero a Asturies y a la so xente, pero voi facelo igual. Tar con Kevin son rises aseguraes, conversaciones llargues y fondes, y tar n’Asturies ye’l bon comer y la guapura del campu abiertu. ¿Les dos coses xuntes? La perfeición.