—Prestame viaxar a los sitios más aleatorios cuando marcho de viaxe —dixo Fer, probablemente mientres comíamos nun bufé llibre.
—Teníemos d’ir al mio pueblu —dixi yo—. Nun hai sitiu más aleatoriu que’l pueblu onde medré.
Y foi asina como Fernando y yo acabamos llegando al aeropuertu de Manchester, onde se punxo darréu a reservar un taxi pal hotel equivocáu. Una vez llegaos al hotel correutu, pedimos una copa en Canal Street y cenamos nel McDonald’s pa entamar la so inmersión na cultura británica.
Mientres dibuxaba con procuru una llinia de ketchup enriba d’una de les mios patates frites, fui dándo-y vueltes a posibles planes pa los díes siguientes. Diome cuenta de que los turistes españoles nun suelen aventurase más al norte que Nottingham, asina que sentía cierta presión por amosar-y a Fernando lo meyor del norte.
Al final decidí que fariemos lo que yo fairía normalmente. Comimos cola mio hermana, tomamos un café nel Northern Quarter y bebimos unos cócteles improvisaos enantes de pillar l’autobús pa Burnley. Una vez instalaos na casa de los mios padres, dimos una vuelta pel pueblu, montamos una foguera pa Bonfire Night, tomamos el té nuna barcaza y cenamos una pizza con Jemma y Lucy que paeció envelenar al probe Fer, que pasó’l día siguiente na cama.
El momentu más destacáu del viaxe foi la nuestra excursión a Blackpool. Vivimos la emoción del parque d’atracciones, la decadencia del muelle vieyu y la ludopatía de les tragaperrres de dos peniques nun salón de xuegos con temática pirata. Comimos fish and chips na playa y unes ostres nuna de les últimes osteríes de la ciudá. El tren de vuelta taba enllenáu de llates de sidra vacíes y dexónos a mediu camín pa pillar un autobús de sustitución. Vamos, que foi una esperiencia bien propia del norte d’Inglaterra, una que podría haber vivío fácilmente na mio infancia.
Una vez recuperáu Fer de la so intoxicación pizzera, volvimos al aeropuertu pa pillar ún de los mios queridos vuelos de Ryanair con destín Madrid. Na terminal, ente guah.es llorones y viaxes escolares escandalosos, di-y les gracies a Fernando por acompañame nel viaxe. Siempre presta un viaxe al pueblu, pero compartir la esperiencia con daquién nuevu fíxome apreciar tovía más el mio norte d’Inglaterra natal.
¡Puxa’l norte!
