Seis hores abástenme pa volar dende España a Canadá, pero pasar seis hores nel coche nun se considera nada raro nos Estaos Xuníos. Eso foi lo que me dixo Megan mientres nos llevaba conduciendo escontra Boston, la ciudá onde estudió y que ta a unes seis hores en coche de Burlington.

Boston ye’l llugar más européu que me paeció de tolos sitios d’Estaos Xuníos onde estuve. El metro tenía un aire parisín, les cais paecíen ingleses y los cannoli que zampamos sabíen a Italia. Sentíame como en casa hasta ver a la xente coles sos gorres y los sos acentos yanquis falando de dir ver el «ball game».

Resulta que yera xusto al ball game al que íbamos Megan y yo. Un sitiu llamáu Fenway Park ye la casa de los Boston Red Sox, un equipu que me sonaba vagamente y del que Megan ye bien fan. Consiguiónos unes entraes de última hora mientres el soníu del himnu nacional resonaba pel estadiu, una esperiencia bien rara pa un extranxeru. Teníemos asientos bien arriba nes grades, pero colémonos nun sitiu meyor cuando se marcharon dalgunos mientres el partíu. A mí eso la verdá ye que me daba igual, porque entá nun entiendo esti deporte nel que los xugadores paecen pasar la mayoría del tiempu paraos, ensin facer nada. Asina que pasé la mayor parte del tiempu probando los meyores/peores platos típicos del estadiu.

Esa nueche, y mientres cruciábamos un puente sobre’l puertu, abriéronse los cielos. Llegamos a casa calaos hasta los güesos, polo que foi un milagru que nun pilláramos un constipáu de los gordos al día siguiente cuando nos subimos al coche camín del siguiente destín: Rhode Island.

La parte paterna de la familia de Megan vien del estáu más pequeñu del país, un llugar con un acentu bien peculiar. Esto deprendílo mientres probaba’l famosu clam chowder nun restaurante de mariscu con vistes a la playa. Pasamos dellos díes cola tía y la prima de Megan, pero tamién pudimos escaparnos a tomar un heláu bien riquín, comer nun sitiu modernín y pasar la última nueche caminando pola playa hasta un bar míticu que da al mar.

Mientres disfrutaba de la música country en directo nesa taberna tambaleante y llena de personaxes, puse a pensar en cómo cada decisión y cada cosa que pasara na mio vida me llevara a tar nesti sitiu tan al debalu, nesti momentu concretu. Pero namás depués de conseguir despegame d’una muyer borracha con gorru vaqueru que me obligara a bailar con ella, tuve tiempu de pensalo meyor falando con Megan y mirando les ondes. Diome cuenta de que nun había meyor llugar pa tar agora mesmo.