Agora creo na supremacía del tren. Vale, viaxando en tren tardes más que n’avión, pero toi equí instaláu nun asientu espacioso dempués d’una visita a la cafetería pa un sándwich recién fechu que comí tumbáu nun sofá. Hai coses que ver pela ventana, hai WiFi y afórrase abondo tiempu y estrés al nun tener que lidiar colos aeropuertos, siendo estos los espacios más hostiles xamás edificados polos humanos.
El mio pase Interrail tamién me salvó de dellos infartos. Saber que ye tan fácil como coler el siguiente tren en casu de perder una conexón nun tien nada que ver col agobiu de correr pol aeropuertu de Doha pa llegar al siguiente vuelu. Pensaba que coler trenes per Europa yera una actividá más propia d’adolescentes, pero la flexibilidá de poder xubime a casi cualquier tren dexóme bien tranquilu.
Tamién me permitió verme con unos amigos y visitar dellos llugares que llevaba tiempu deseando conocer. Dende los picos altos d’Austria hasta la llanura inmensa de los Países Baxos, viví unos contrastes xeolóxicos importantes, exploré ciudaes y pueblos preciosos y atopéme con paisaxes naturales que paecíen sacaos d’un documental de National Geographic.
El viaxe empezó y acabó con unes nueches en París tres pasar por Barcelona. A la ida, fui a un parque d’atracciones con Danni y a la vuelta pasé un par de nueches de turista solu. Mientres el restu de les tres selmanes del viaxe xubí a les montañes con Loredana, comí pizza casera deliciosa fecha por David, refuxiéme baxo un toldu mientres una cena lluviosa n’Alemaña con María y recorrí dellos pueblos d’Holanda con Cami. Conocí a les families de los mios amigos, a los amigos de los mios amigos y a los sos amigos tamién. Inclusive fixi dalgún que otru amigu nuevu pel camín, munches vegaes nos sitios más inesperaos. Púxeme a falar con un par d’estadounidenses nun autobús turísticu y pesllé un restaurante cola camarera y el cocineru.
Tres pasar l’iviernu nos Estaos Xuníos tres años siguíos, ye verdá que eché de menos la compañía de los mios amigos d’ellí. Sicasí, esti viaxe européu foi l’equilibriu perfectu ente viaxar solu, reencontrame con amigos y quedame en cases d’otros amigos que, por una razón o otra, acabaron viviendo en distintos sitios pel continente. Llevaba tiempu deseando facer un percorríu pol mio continente natal y xusto esti añu too se dio pa que pudiera. L’accidente que sufrí l’añu pasáu fixo que entá tuviera aprendiendo a caminar nes feches nes que, de normal, taría buscando vuelos escontra los Estaos Xuníos. ¡Tamién influyó muncho’l preciu del seguru de viaxe pa los meses posteriores a una operación!
Foron unes vacaciones de branu increíbles y namái foron posibles gracies a tolos amigos que m’acoyieron nes sos cases y que m’acompañaron pel camín. A toos vosotros: munches gracies. En breve volveré a xubime a un tren…
