Dempués d’unos díes de descansu polos festivos, el mio añu entamó tal y como acabara’l anterior: con sesiones diaries de fisioterapia. Cambié les pantoneres por unes máquines que paecíen de la NASA, que m’ayudaron a ganar músculu y flexibilidá nel rodiellu, una articulación que agora tenía enllena de titaniu. Col pasu de les selmanes pasé d’una siella de ruedes a un par de muletes y, col tiempu, a una sola. Estes meyores caltuvieronme a flote frente a la monotonía del mio día a día y les molesties que sufría.

Otra cosa que me caltuvo cuerdu foi la parte social de la fisioterapia. Nes mios viaxes diaries n’ambulancia falaba colos conductores y con otros pacientes, ún de los cualos yera Fernando. Como empezáramos la fisioterapia nes mesmes feches y tocábanos dir a la mesma hora, de cutiu coincidíamos na ambulancia o nes máquines, lo que nos llevó a facenos bien amigos. La so compañía tresformó una rutina aburrida en daqué muncho más prestosu.

Tamién tuve la suerte d’acoyer al mio padre, que vino visitame y a disfrutar conmigo d’alguna salida que yá empezaba a poder facer, anque coles muletes cada pequeña xera paecía eterna. La mio madre tamién volvió verme, lo que supunxo la oportunidá perfecta pa disfrutar del tiempu en familia ensin que tuviera que facer de cuidadora.

Al cabu de los meses, entamé a ver la lluz al final del túnel. Pasín ente pasu fui consiguiendo facer más y más coses de manera independiente, hasta llegar a baxar la escalera a la pata coxa pa facer dalguna xestión pela cai. Nun miento si digo que creo que casi me puse a llorar la primer vegada que conseguí baxar la basura yo solu: y non solo pol dolor…