Tamos toos demasiado cómodos. Eso ye lo que diz una nota nel mio móvil del 8 de xineru de 2014. ¿Qué taba faciendo yo esi día? Nada, según la mio axenda. Taba filosofando, pensando en cómo solemos evitar los asuntos incómodos nes nuestres conversaciones del día a día. Molestábame que evitar estos temes difíciles acabara provocando un estancamientu social. Son palabres grandes. Demasiado grandes pa una tarde de llunes. Asina que güei nun voi falar de la comodidá en sentíu abstractu, sinón de la física.
Yo toi más cómodu nesta época del añu. Fai sol, pero tamién refresca. Nun hai lluvia que me cale nin vientu que me dexe esgreñáu. Soi fíu del norte d’Inglaterra, asina que nun aguanto bien el calor. Paez que seguí’l mio propiu conseyu cuando Sara me propunxo volver a Alacant. Quiciabes me sintiera demasiado cómodu col aire acondicionáu del mio pisu en Madrid. Quiciabes pensara que lo que necesitaba precisamente yera aquella humedá pegañosa de la costa este.
Como la última vez, pasélo fenomenal con Sara. Comimos de maravilla, probamos dalgún que otru cóctel y hasta fuimos visitar Tabarca. Foi xenial, pero toles actividaes quedaron un poco eclipsaes pola humedá agobiante del branu alicantín. Cada pasu que dábamos fuera del hotel provocábame rozadures ente les piernes y, dempués de cada bocáu, tenía que recurrir a la servilleta pa secame les gotes de sudor de la frente.
Dacuando siéntome totalmente integráu n’España, pero entós interponse’l mio cuerpu y recuérdame que ye sangre anglosaxona la que me cuerre poles venes sobrecalentaes. Nun aguanto’l calor como Sara.
Pero lo bono de mirar les coses con perspectiva ye que’l tiempu cura tolos males. Y, al facelo, esanició de la mio memoria cualquier rastru de malestar. Agora namás pienso nos restaurantes guapos, nel nuestru paséu pola islla de Tabarca y nes charres interminables que tuvimos hasta bien entrada la madrugada. Sonrío al acordame de la primer nueche. Al salir del hotel, entré en pánicu al pensar que yá yera tarde y que nun teníemos reserva pa cenar. Sara díxome que nun me preocupare, que yá se me adelantara y tenía reservada una mesa nun restaurante cercano. Lée’me’l pensamientu.
Quiciabes el mio yo de 19 años tuviera razón. Quiciabes toi demasiado cómodu. Quiciabes tendría que somorguiame más a menudo nel calor de la Costa Blanca.
