Unos arbustos pasen volando, convirtiéndose nun borrón verde. Dalgunos árboles más alloñaos paecen xirar despacín, mirando pa min mientres paso. Los rayos de sol individuales distínguense nel cielu, la lluz deshilachada ente dalgunes nubes blanques. Mientres el mio tren pasa a tola velocidá, esta lluz tiñe de tonos cálidos los campos de Castiella y Llión. Esta zona tien el so encantu, pero pa min y pa munchos otros que vamos camín de la costa, nun ye más qu’una especie de zona de pasu: una estensión inmensa que tenemos que cruciar pa llegar al nuesu destín.
Dalgunos puen quexase d’esti tiempu extra de viaxe, pero yo creo que ye bastante necesariu. Son un par d’hores más que dixebren l’axitación de la ciudá de la serenidá del mar. Ye un momentu pa que’l cerebru procese’l cambéu de paisaxe. Ye un periodu de transición que permite que la mio cabeza asimile que primero taba nun sitiu y agora toi n’otru.
Uso la pallabra llugar equí nel so sentíu más ampliu. Siempre tuve la sensación de que los sentimientos y les sensaciones paecen tar anclaos a llugares concretos. Asina que, cuando falo de pasar d’un llugar a otru, en realidá refiérome al fechu de pasar d’un estáu mental a otru. Creo que un poco de fricción pel camín pue ayudar a facilitar esti cambéu de chip.
Nun toi proponiendo que fagamos peor el procesu de viaxar: yá ye toa una odisea. Los aeropuertos son una pesadilla, los autobuses puen ser afogadizos y los taxis cuésten-te un güeyu de la cara. Nin siquiera los trenes queden fuera de les mios crítiques, a pesar de ser un defensor acérrimu del ferrocarril.
Da igual el vehículu que escueyas: siempre va haber dalgún contratiempu o dalgún quebraderu de cabeza al desplazase. Pero, ¿ye necesariamente malo? Nun lo sé. Nun creo que lo seya. Quiciabes namás toi volviéndome lentu y tengo les neurones feches papilla por años de redes sociales, pero siento una necesidá xenuina de tener esti tiempu pa procesar el cambéu. Nun mundu tan rápidu, ta bien da-y un poco de tiempu a la mio materia gris pa que se dea cuenta de que toi en movimientu.
Esti tiempu extra ye lo que me permite desconectar, relaxame y dexar atrás tol estrés acumuláu de la vida adulta. Estes hores de transición faen que llegue al mio destín siendo la mio meyor versión: una versión de min prepará pa esplorar, charlar y relaxase ensin el runrún mental del trabayu y de la vida diaria. Permítenme disfrutar de los atapeceres con Kevin n’Asturies, d’una cena col mio padre nel pub del mio pueblu y de munchos momentos especiales compartíos con amigos.
Por eso doi-y les gracies a la distancia. Ayúdame a desconectar.
