¿Alcuérdeste de la pandemia? Yo tampoco. Siempres me fascinó la capacidá del celebru humanu pa escaecer lo malo y acordase de lo bono. Decateme d’esti fenómenu dempués de les nueses vacaciones familiares n’Orlando, que fueron una maravía, pero que tamién supunxeron munches hores faciendo cola baxo la calor húmeda y afogadiza de Florida. Sicasí, una vegada de vuelta n’Inglaterra, namás m’alcuerdaba de la emoción de les atracciones, la maxa de los desfiles y les rises cuando toos descubrimos que’l chocolate d’Estaos Xuníos sabe a quesu.
Fui pela tanxente. Saco’l tema de la pandemia porque foi entós cuando empecipié a valorar daqué que primero daba por fecho: caminar. Caminar ye daqué que llegué a disfrutar y apreciar, pero nun quería aburrivos rellacionando’l tema col mio accidente. Nun quiero dedicar otra entrada a enrollame falando de cómo me rompí la pierna.
Asina que: la pandemia. Pasé unos cuantos meses zarráu nel mio pisín equí en Madrid, esperando con ganes el día nel que nos dexaren salir a dar una vueltecina, anque fuera. Esi aliviu acabó llegando coles caminates diaries autorizaes pol Estáu: una hora pa estirar les piernes y enllenar los pulmones d’aire fresco y llibre de virus. L’exerciciu humanu más básicu convertiérase nun luxu. Dende entós, les mios caminates son sagraes.
Últimamente, esta nueva manera de ver les coses llevóme a aprovechar cualquier oportunidá de visitar un sitiu nuevu. Acepté con munches ganes la invitación de Fer pa visitar Segovia y tamién la de la mio tía, que m’invitó a pasar unos díes en Murcia. Tenía ganes de poner les zapatilles cómodu (acuérdate de que yá tengo 30 años) y descubrir lo que s’escuendía nes sos cais.
Repasando les semeyes que saqué, veo que lo que más m’impautó de dambos llugares foi la guapura de lo antiguo, bien cuidáu o non. Les cases vieyes de Segovia y el so acueductu romanu tienen una presencia imposible d’ignorar, pero los requexos oxidaos d’aquel pueblu murcianu tamién me prestaron una barbaridá… quiciabes más que Segovia.
¿A qué conclusión llegué dempués d’esta reflexión? Nin idea. Nin siquiera son les ocho de la mañana y equí toi, sentáu nel aeropuertu de Madrid, refregándome los güeyos y acabando un café. Sicasí, mientres me preparo pa pasar dos hores ensin poder mover les piernes, espero con ilusión la mio llegada a Milán y les munches hores de caminar que me tán esperando. Supongo que ye eso, al final: una carta d’amor al fechu de caminar.
