Mientres taba echáu na cama, cola pierna rota ya inmóvil, tuve muncho tiempu pa pensar no que diba facer una vegada curáu y de pie. El primeru elementu de la llista d’idees yera «vivir esperiencies nueves con amigos», con «nueves» sorrayada pa enfatizar. Por eso supe esautamente lo que tenía que facer al ver un anunciu pal Tren de la Fresa, un tren históricu que ufierta escursiones diaries n’ochobre: convencí a Sara y Fernando de que s’apuntaren a un viaxe comigo.
Los trés axuntámonos nel Muséu del Ferrocarril un domingu pela mañana, cansos ya irritable, pa que nos dieren la bienvenida los glayíos d’una tía que diba disfrazada col uniforme históricu d’un conductor de tren. Horrorizáu, decateme de que llevara a los mios amigos a una esperiencia interactiva pensada pa neños, con actores y too.
Una vegada sentaos a bordu, arrodiaos de munches families nueves, el tren entamó’l so recorríu hasta Aranjuez. Pusiémonos a falar y too paecía bastante normal hasta qu’apaecieron dos actores con maletes. Pusiéronse a glayase nuna discusión que nun fui a siguir, pero Sara, Fer y yo pusiémonos a rir del espectáculu tontu.
Lo que nun sabíamos yera que lo meyor taba por venir. Dempués de l’actuación espontánea, entamó a sonar música pela megafonía y los actores animaron a tol vagón a cantar con ellos la canción del Tren de la Fresa. Nós ya nun podíamos más y acabamos muertos de risa.
Al llegar a Aranjuez, cambiamos los bancos de madera del tren pola última fila del chiquitren, un tren turísticu que va pela carretera, igual que los que vía nos pueblos de Mallorca nos que braniaba de pequeñu. Siguió una vuelta pel ríu en barcu y depués una comida na que probé per primer vegada les ancues de xaronca. Diría que sabíen a pollu, pero la verdá ye que sabíen al ayu col que taben preparaes.
Mientres el viaxe de vuelta tuvimos que volver cantar la canción del Tren de la Fresa, pero esta vegada con un cuencu de freses na mano, un guiñu al usu históricu del tren pa llevar la collecha de freses d’Aranjuez hasta’l centru de Madrid.
Foi nesi momentu, mientres cantaba «tren de la fresa, tren de la fresa, baila sin parar y mueve la cabeza», cuando me di cuenta de que hasta los planes más tontos, en compañía de bonos amigos, vuélvense xeniales. Seique seya comer unes freses fresques, cantar una canción tonta o pasar d’una plataforma a otra ente vagones, hai que tomase la vida —y la seguridá— con un poco menos de seriedá.
