40 graos. Un flashback de la pandemia, cuando 40 graos yeren el llímite de la temperatura corporal: d’ehí p’arriba había que llamar al 112. Quedé mirando pa los númberos, cuatro-cero, nel termómetru, mientres la pantalla parpadiaba en colloráu pa señalar lo obvio: 40 graos son munchos graos. La cifra tampoco me sorprendió. Taba en calzoncillos, col cuerpu espatarráu enriba la cama. Les sábanes yá taben empapaes de sudor. Nun facía falta ser nengún xeniu pa decatase de que tenía fiebre.

Si fuera cualquier otru día, habría tomáo aquello como una señal del cuerpu de que tenía que parar un poco. Habría bebío un sueru, dáome una ducha fría y lleváo la televisión pa la habitación pa ver vídeos que me podrecen el celebru. Habría sío un descansu bien recibíu.

Pero güei non, porque tenía coses que facer. Tenía planes, y nun yera pa tomar una caña con amigos. Yeren d’esos planes que tienen códigu de vistimenta, d’esos a los que tienes que confirmar l’asistencia con meses d’antelación. Nun yera un sábadu cualquiera: casábase Julia. Y 40 graos dicíen que nun diba poder tar ellí.

Mientres me compadecía de mi mesmu, la voz de María llegó dende la sala, entrugándome cómo me atopaba. Ella baxara dende Bilbao pa xunise a la celebración, asina que sentí entá con más fuerza la presión de consiguir recuperame a tiempu. Como la fiebre debilitaba la mio capacidá pa suavizar les respuestes, contesté con un tonu daqué secu: atopábame como una mierda, gracies.

Col pasu de les hores, sicasí, pasó daqué milagrosu. Atopábame meyor d’ánimu, dexé de sudar y marchóseme la fiebre. Conseguí llevantame, ducharme y xubime a un taxi. El mio cuerpu atopara una reserva d’enerxía, lo que me recordó a la riada de sustancies químiques felices que m’inundó cuando rompí la pierna. Nun sabía que tenía tantes endorfines escondíes per ehí, pero dábayes les gracies. Eso sí, nun taría mal que’l mio celebru me regalara dalgunes más mientres el restu del añu…

Al final, llegué sanu y salvu a la ilesia pa una misa preciosa y, depués, fuimos n’autobús hasta una finca guapísima onde celebramos la recepción. De sópitu yera medianueche y taben llamando pa que la xente xubiera al primer autobús de vuelta a Madrid, pero yo tábalo pasando demasiado bien como pa marchar. La fiesta siguió hasta les cuatro de la mañana, una hora na que yo entá taba de pies y bailando… más o menos.

Más qu’un milagru de la medicina, esta historia ye un testimoniu de lo fabulosa que foi la boda de Julia y Javier. Hubo bona compañía, bona música, bona comida y un ambiente inigualable. Prestóme cada segundu y alégrome muncho de que’l mio cuerpu me dexara tar ellí y compartir con ellos el so día especial. Dende llueu, eso gana por goleada a pasar la tarde viendo teoríes conspiranoiques en YouTube.

Pero nada nesta vida sal gratis: al día siguiente atopábame peor qu’antes. Tenía’l cuerpu fechu polvo y el celebru fritu, pero nun hai sudor nin bilis nel mundu que puedan quitar valor a los recuerdos fantásticos de la nueche anterior.

¿40 graos? Eso son coses de novatu. ¡Puxa Julia y Javier!