Hai momentos nos que me vuelvo abondo irritable. Dempués, cústame entender por qué toi tan irritáu, lo que termina frustrándome. Esa frustración, de resultes, fai que tea tovía más insoportable. Los que me conocen saben bien lo muncho que puedo dar la lata cuando toi asina de baxón.
Dacuando, esti malestar vien porque me quemé y, simplemente, toi faltu d’un bon descansu. Pero otres vegaes, la causa ye más complexa y más difícil d’atopar. Puede que necesite un tiempu pa llegar a entender qué ye lo que me pasa. “Un tiempu” suena sospechosamente paecíu a “un descansu”, asina que —seamos realistes— lo que de verdá me fai falta ye un bon retiru.
Decateme d’esto xusto enantes de Selmana Santa, polo que decidí facer daqué que llevaba años pensando: busqué un hotel-spa de cinco estrelles. Dábame igual onde fuera; yo namái quería que les decisiones más importantes del mio día fueran la proporción ente lo salao y lo dulce nel bufé del almuerzu y si quería que l’agua del jacuzzi tuviera caliente o templao.
Escribiendo esto, acabo de decatame de que toi siendo bastante insoportable. “Un trabayador de oficina va a un hotel de luxu porque acabó quemáu” nun ye precisamente la historia más orixinal, nin tampoco una cola que la mayoría de la xente se sienta identificada. Escucho al mio yo del pasáu xulgándome: problemes del primer mundu, revisa los tos privilexos, etcétera, etcétera. Pero, sinceramente, ye lo que hai. Conforme fui faciéndome mayor, empecé a entender a los mios padres y la so insistencia en pasar quince díes al añu tiraos nuna tumbona en Mallorca. La vida adulta cansa.
Y con esi cansanciu vital enriba tuve que enfrentarme al retu d’organizar un viaxe. Antiguamente, viaxar siempre suponía la ilusión de planiar, la gracia de pillar un tren o un avión y idees como “nun ye’l destín, ye’l viaxe”. Agora ye un rollu enorme que tengo que tragar pa llegar onde tenga que dir. Por eso, y a pesar de toles reserves que tengo cola descarga cognitiva, abrí ChatGPT. Como yá tenía’l celebru fritu, supunxe que usalu nun podía faceme más dañu.
Y asina acabé en Tarragona. Baxé del tren nuna estación que la todopoderosa IA me dixera, con toa seguridá, que taba cerca del hotel. Llegué ellí dempués de 45 minutos y 55 euros de taxi: una bona dosis de karma dempués de pasar tanto tiempu echándo-y sermones a tol mundu sobre la necesidá de revisar too lo que diz la intelixencia artificial.
Al facer el check-in nel hotel, fixi check-out de la vida. Metí’l móvil na caja fuerte y cambié les playeres por unes chancletes d’algodón. Repartía’l tiempu ente’l spa, la piscina y la playa. Creo que nunca antes pasara tantu tiempu vistíu con bata. Y, xusto cuando taba empezando a aburrime de tanta relajación y tanta soledá, atopé a daquién col que pasar el tiempu que me quedaba… pero esa ye otra historia dafechu.
Anque físicamente nun facía absolutamente nada, disciplina na que soi un auténticu especialista, al mio celebru costó-y bastante más relajase. Al entamu, esti ambiente de luxu nun yera más qu’un fondu guapu pa los mios pensamientos. Pensé en munches coses, pero la principal foi la necesidá de saber por qué tenía tantes ganes d’un retiru asina. La conclusión a la que llegué foi bastante sencilla y un poco evidente: lo que necesitaba yera, d’una puñetera vez, un putu descansu.
