Paez que últimamente toi metiendo palabrotaes nos títulos de les entraes, asina que tengo que tener daqué épico que cuntar. Nun puedo revelar que toi amestando esti testu de rellenu namás porque quiero una escusa pa espublizar unes semeyes bien prestoses. Bueno, a lo menos a mí paécenme prestoses. Pero taba claro que me lo diben paecer: la iluminación fascinóme dende siempre. Anque yá volveremos a esti tema.
God’s Own Junkyard suena a daqué que podríes atopar nos Estaos Xuníos y tien pinta de ser un sitiu que lo petaría en TikTok. La so coleición de lluces de colores ye’l fondu perfectu pa unos influencers miserables que busquen alimentar los algoritmos con más porquería, mientres estos intenten chupanos hasta la última gota de dopamina. Tengo claro que esti sitiu tuvo que salir nes redes sociales en dalgún momentu, porque, si non, nun sé cómo podía enterame de la so esistencia fai unos años.
Fuera como fuera, quedó na mio llista d’esperiencies pendientes hasta esti branu. Fui a Londres visitar a Rhea y tuve que buscar entretenimientu pela mio cuenta los díes que ella trabayaba. Cuando’l mio tren llegó a la estación de King’s Cross, eché-y un güeyu al mio Google Maps pa buscar sitios marcaos como «quiero dir». God’s Own Junkyard destacaba como una chincheta solitaria nuna esquina del mapa, pero, namás abrir la so ficha y ver de qué diba, supe que tenía que dir.
Dos díes dempués taba nun hangar nel norte de Londres, mirando cola boca abierta una coleición de neones antiguos. Sabía que aquel sitiu tenía too lo que me presta: lluces, colores y un bar onde picar daqué. Lo que nun sabía yera que tamién me diba dar la oportunidá de xugar unes partíes por cuatro perres nun par de máquines antigües de pinball. Taba —y siento nun atopar una manera meyor de dicilo— na mio puta salsa. Toes estes coses son pasiones mios, pasiones que me acompañen dende que tengo usu de razón. Espero que la palabrota tea xustificada. Perdona, papá.
Mientres andaba d’un llau pa otru ente les pieces y falaba col dueñu, daqué removióse dientro de min. Volví conectar con una pasión pola iluminación que nunca llegué a desenvolver del too y que, sicasí, tampoco esploré tanto como me prestaría. Esto ye lo que me presta y esta ye la mio xente. De momentu nun tengo tiempu pa construyir un mundu enteru alredor de la mio pasión —como fixo esti señor—, pero sí que tengo que abrazala y esfrutala too lo que pueda.
