L’añu pasáu, la rodía taba dándome guerra y la situación política nos Estaos Xuníos taba faciéndome temblar. Vistu’l panorama, decidí organizar el viaxe anti-EEUU perfectu. Los trenes sustituyeron a los aviones y los rincones d’Europa sustituyeron a les Amériques. Ye verdá que me prestó muncho esta ruta, pero esti añu esperaba retomar los mios viaxes añales al otru llau del charcu. Una combinación de factores, na so mayoría d’orixe estadounidense, llevóme a aplazar esi viaxe una vegada más.

Esto dexóme cola cuestión de pa ónde dir. Prestábame visitar a Heidi en Noruega o a Loredana n’Austria, pero les dos tán llegando al final de los sos embarazos y entá nun me veo preparáu pa enfrentar una sorpresa d’esi calibre. Por eso, decidí visitar a los mios amigos nel sur d’Inglaterra, yá que facía bastante tiempu que nun me dexaba caer per aquellos llugares. Yá soi mayor pa consiguir descuentos nos pases d’Interrail, asina que nun me quedó más remediu que recurrir al mio vieyu amigu Ryanair.

Dende l’aeropuertu de Londres, garré un tren hasta Norwich, onde Luisa y Sol yá tán instalaos na so primer casa. Luisa propunxo que visitáremos Great Yarmouth, una ciudá turística que cayó en decadencia cola llegada de los vuelos internacionales baratos nos años setenta. Anguaño ye un destín conocíu pola so cutrez, lo que quier dicir que a min encantóme. Nun hai nada meyor que una salchicha rebozada y frita o dar una vuelta nuna montaña rusa antiquísima na que un paisanu súbese contigo y tien que frenar el vehículu a mano con una palanca. Pela so parte, Luisa convirtió la so pasión poles manualidaes nel so propiu negociu, asina que ún de los momentos más destacaos foi la tarde que pasamos faciendo unes caxes de lluz y unos pendientes col logotipu de Mercadona. Foi una visita tranquila y prestosa de verdá.

El segundu tren llevóme a Londres, onde pasé unes cuantes nueches con Rhea y Percy, el so gatu nuevu y absolutamente preciosu. La primer mañana despertéme y atopélu acurrucáu conmigo na cama. Esa nueche baxamos al West End y vimos la comedia Oh, Mary!, con Jinkx Monsoon. ¡El día perfectu!

Ye verdá que volé hasta Inglaterra, pero —como podéis ver— volvía utilizar los trenes pa moverme d’un sitiu a otru. Esti espíritu viaxeru siguió hasta’l siguiente destín: Holanda. Garré’l Eurostar per primer vegada, daqué que me fizo muncha ilusión. Pero falaremos más de los Países Baxos na siguiente entrada…