Dacuando necesites facer munches, munches coses. Lleventase, dir caminando hasta’l centru, almorzar, volver pa casa, duchase, preparar la mochila, conducir hasta un parque d’atraiciones, entrar na casa encantada, comer una hamburguesa, empapase nos rápidos, secase na montaña rusa más rápida, descansar nun bancu, xubise a otra montaña rusa, descansar n’otru bancu y repetir el ciclu hasta que t’aburras. Ye lo que fiximos Cami y yo la última vez que tuvi en Zierikzee, el pueblu holandés nel que vive ella agora.

Pero dacuando nun fai falta facer absolutamente nada.

Nun facer nada ye una maravilla, pero ye entá meyor en bona compañía. Amás de Cami, nun hai naide con quien prefiera echar un vistazu a unes tiendes o perdeme nun monte. Podemos falar hasta bien entrada la nueche o quedar en silenciu, caún col so móvil, mentes llanzamos unes bobines de colores nun xuegu nuevu al que m’engancha ella.

Tamién ta’l llugar. Zierikzee ye’l sitiu perfectu pa pasar unos díes ensin facer gran cosa. Ye un pueblu arrodiáu d’agua y con un ambiente igual de tranquil. Apenas hai coches nin grandes grupos de persones peles cais. ¡Y vaya cais! Cada edificiu ye una auténtica pasada de guapu. Si a too esto-y sumamos un pocu de sol de branu, tenemos el plan perfectu.

Nel contraste ta la gracia de la vida. Un añu, Cami y yo pasamos tol día viviendo aventures; al siguiente, tamos tiraos nel sofá. Sía como sía, pasámoslo bien.