Dra. Briggs

01.08.25 — Sheffield

Dra. Briggs

01.08.25 — Sheffield

Acuérdome de gritá-y a la mio hermana una vez. Tábamos nel xardín de los mios padres, onde yo inventara dalguna trampa mortal nueva, como un viaxe en trineu por una viga inclinada. Dio-me rabia que ella nun quisiera xubise. Asina empezó la nuesa adolescencia, una época na que nun nos prestábamos muncha atención más allá d’alguna discusión puntual.

Casi venti años depués, atopábamonos na Universidá de Sheffield, onde Eleanor se preparara pa la so graduación. Vela apaecer vestida de coloráu brillante ente un mar de capes negres foi un momentu emocional pa toos. Nun sería una graduación cualquiera: ¡la mio hermana convertíase na doctora Briggs!

Nun pude entrar na ceremonia por temes d’aforu, pero pasélo bien nel bar de la universidá cola pareya d’Eleanor y con dalguna amiga so. Xugamos al billar, tiramos unos dardos y vimos la retransmisión en direuto de la ceremonia na televisión que taba enriba de la nuesa mesa. Asina tuve la oportunidá de pone-y cara a los nomes que Eleanor llevaba años mencionando. Tamién mentiría si dixera que nun foi un aliviu saltame los momentos más aburríos del actu hasta que saliera la categoría que nos interesaba: doctores en filosofía.

Al acabar les formalidaes, tocaba celebralo como ye debido. Tomamos daqué, vimos el llaboratoriu onde Eleanor trabayara y caminamos hasta’l centru de Sheffield pa comer. El día facíase-yos llargu al mio padre y a mi, pero nun foi nada que nun se pudiera arreglar con una siesta táctica nos bancos d’una mesa apartada…

Como te puedes imaxinar, toi mui orgullosu de la mio hermana. Entá m’alcuerdo del día en que nos anunció que quería ser bióloga, pero nengún de nós imaxinábamos que, tantos años depués, saldría de la universidá siendo doctora. Tampoco lo creyera si, mientres aquellos años de pelees por tonteríes, me hubieren dicho que llegaríamos a llevanos tan bien ella y yo. Agora valoro muncho la relación que tenemos y la facilidá cola que la mantenemos.

Norabona, Bel.

Alicante

12.07.25 — Alicante

Alicante

12.07.25 — Alicante

Esti añu ye l’últimu nel que puedo disfrutar de los descuentos del Veranu Xoven, y Sara nun diba dexar que la oportunidá se nos pasara per alto. Dempués d’una quedada d’última hora pa planificar el viaxe, los dos salimos de Chamartín nun AVE con destín a Alicante pa pasar un fin de selmana xuntos na costa.

El nuesu hotel resultó ser bastante pijín. Allugáu nel centru del cascu vieyu, taba a unos cinco minutos de la playa na que finalmente pasaríemos una tarde quemándonos vivos por desaprovechar la sombrilla que compramos esi mesmu día. Eso sí, la insistencia de Sara sobre les ventayes del plan playa nun yera del too una mentira: sí que disfruté l’agua templada del Mediterraneu y la desconexón de dexar el móvil na habitación. Lo que nun me entusiasmó muncho foi’l toque cruxiente que-y dio a la comida l’arena que se-y coló.

Pa falar de meyores esperiencies gastronómiques, aprovechamos al máximu’l tar na Comunidá Valenciana pa fartucanos d’arroces y mariscu frescu. Los dos díes desayunamos orchata y fartons y pasamos les tardes mirando a la xente mientres paseábamos poles cais. Les nueches pasémosles en distintes cocteleríes nel muelle del puertu, onde Sara pudo esperimentar lo que ye ser un británicu n’España: nun paraben d’averase camareros y vendedores pa ufiertame escursiones en barcu, visites guiaes y paelles “auténtiques”. Creo que-y fizo gracia.

Sara foi una compañera de viaxe ideal. Dempués de suxerir que fixéramos el viaxe en primer llugar, nunca se cansó d’investigar sitios pa comer, cenar y visitar. La mio única aportación a la organización del viaxe foi mercar les entraes pal ascensor del Castiellu de Santa Bárbara la primer nueche, un luxu necesariu nel mio casu, yá que la pierna mala entá nun me dexaría escalar el enorme peñón nel que s’atopa’l castiellu. Subimos a ver l’atapecer, una recomendación de la mio compañera Rebecca que foi la bienvenida perfecta a la ciudá.

Entá me quedaben kilómetros por caminar, sicasí. El postrer día xubimos hasta la parte más alta del cascu vieyu pa visitar un barriu cuyes cais yeren tan guapes como empinaes. Por milagru conseguí facelo cola pata chula, gracies en gran parte a la enerxía d’una llatina de Nestea, una cerveza traviesa y una charra que tuve con una pareya d’ancianos australianos que, pa la mio gran vergüenza, xubíen les escaleres más rápido que yo.

Sobra dicir que lo pasé fenomenal n’Alicante. Anque conseguimos facer una cantidá brutal de coses, les 48 hores voláronnos por completu. Sara nun ye solo una máquina d’organizar, ye una amiga mui especial. Tamién fala polos codos igual que yo: mientres los dos díes que pasamos xuntos, nun paramos nin pa respirar en nengún momentu.

Volveré a Alicante y, ensin dulda, volveré a viaxar con Sara.

Heidi y Axel

15.06.25 — Oslo

Heidi y Axel

15.06.25 — Oslo

¿Vestuarios unisex? Quedaba claro quién éremos los anglosaxones del grupu: Megan y yo nun lo podíemos creer. Retorcíemos el cuerpu dientro de les toalles nun intentu de nun amosanos a la pareya de señores al nuestru llau, preguntándonos cómo se-yos podía ocurrir a los noruegos eso de que toos compartiésemos un mesmu vestuariu diminutu.

Los mesmos noruegos tamién dicen que bañase nel agua xelada del fiordu ye bono pa la salú, pero yo soi la prueba andante de que nun lo ye. Esquivé les meduses amenazadores y evité desmayame col calor afogante de les saunes, pero dalguna otra cosa nun me sentó bien mientres la nuesa escursión de “bienestar” al spa flotante. Desperté bien resfriáu al día siguiente, cosa que supunxo un problema, yá que yera un día mui importante. ¡Casábense Heidi y Axel!

Les celebraciones yá empezaren unos díes antes. Nun bar cualquiera d’un Oslo lluviosu, los cuatro miembros de Cake Club axuntámonos per primer vegada en años. Esti reencuentru siguió al día siguiente con un picnic baxo un gloriosu momentu de sol. Fueron dos planes con muncha conversación mientres nos poníemos al día enantes del gran acontecimientu.

La boda de Heidi y Axel foi un día enllenáu d’amor, rises y —nel mio casu— paracetamol. Colos güeyos llorosos, vi a dos bonos amigos casase al llau d’unes vistes espectaculares sobre’l fiordu d’Oslo. Dempués metímonos toos nun salón preciosu pa comer, charlar y baillar tola nueche nuna celebración que siguió hasta que sacaron unes salchiches envueltes en tortilles de maíz. A mi paecióme una cena un poco dudosa, pero a los noruegos prestó-yos muncho…

Bromes aparte, la boda foi too lo que Heidi y Axel queríen y más. Tamién foi la oportunidá perfecta pa reconectar con vieyos amigos y facer dalgún nuevu pol camín. Nunca dudé de que Heidi y Axel se rodearíen de xente maravillosa, pero sentíme honráu de ser convidáu a participar. Estos díes que pasé n’Oslo tamién me dexaron pasar tiempu de calidá con Megan, Loredana, David y munchos más. Nun hai nada meyor nesti mundu que eses conversaciones de madrugada que s’allarguen tanto que empieza a asomase’l sol pola cortina.

¡Que vivan Heidi y Axel!

Risoterapia

10.05.25 — Blackpool

Risoterapia

10.05.25 — Blackpool

Fueron unos meses duros pa toos. Fui avanzando poco a poco cola mio rehabilitación y la mio familia tuvo lidiando con unos asuntos privaos que nos tán poniendo a prueba.

Estos tiempos difíciles y el fechu de que yo nun pudiera visitar la mio tierra mientres casi un añu enteru fixeron que me xubiera a un avión pa Mánchester con más ganes que nunca. Dempués d’un vuelu curtiu, vieme xuntáu colos mios padres y la mio hermana pa disfrutar d’unos díes de relax y tiempu de calidá en familia. Hasta nos salió el sol, un fenómenu raru n’Inglaterra pero que toos agradecimos muncho.

Tuve que trabayar en remotu dalgún día, pero l’apagón nacional n’España dexóme garrar una tarde llibre. A pesar del caos que s’armó en tola península, a mí viniome de luxu: pude asina pasar más tiempu cola familia.

Tamién fixi tiempu pa veme con dos amigues del alma. Amber llevóme un día a comer a la cafetería d’un parque local baxo’l sol. Al día siguiente, garré una ración de fish and chips y averéme a casa de Jemma pa que nos viéramos dempués de que me visitara en Madrid xusto antes del accidente.

El sábadu salí con Abi y Danni pa pasar el día nunu de los nuesos llugares favoritos: Blackpool Pleasure Beach. Echamos unes cuantes hores nesti parque d’atracciones xubiendo a les montañes ruses, comiendo y mirando la xente rara y fascinante que nos arrodia. Blackpool ye una xoya y un fenómenu cultural importante. Ye como el Benidorm o Las Vegasd’Inglaterra, pero entá más cutre.

Pero, más que nada, foi un día enllenáu de rises. Resultó ser xusto lo que necesitaba. Pasé pola fisioterapia, la hidroterapia y tamién pola psicoterapia: namái me faltaba l’alegría de reíme hasta quedame afónicu y, polo tanto, perder dafechu’l filu mental. Anque nun lo sabía, taba necesitando esta euforia total, d’esa que fai que s’esfumen toles tos preocupaciones y ansiedaes.

Esti día coles mios amigues punxo fin a una selmana que pasé xunto con quien más me conoce: la mio familia. Foi un viaxe bien necesariu.

Xixón

21.04.25 — Xixón

Xixón

21.04.25 — Xixón

L’alta de la fisioterapia y la vuelta al trabayu significaben que tendría, por fin, la llibertá de viaxar. Dende l’accidente nun había podío salir de la Comunidá de Madrid, polo que me punxi a buscar dalgún sitiu —cualquier sitiu— al que dir. Esta busca d’un cambiu d’aires, naturalmente, llevóme a Asturies.

Asturies ye un sitiu al que volveré siempres. Dende que’l mio amigu asturianu Kevin me la presentó, sentí una fuerte atracción por esti cachu de la mariña norte. La so xente, el so paisaxe, la so comida: dalgo tien esta rexón celta que fai que pa mí se sienta como casa.

Cuando Sara me dixo que diba visitar la so ciudá natal, Xixón, supe a ónde tenía que dir. Puede que nun seya la ciudá más interesante nin la más guapa de la península, pero ye un llugar al que-y tengo muncho cariño.

Permitíme’l caprichu d’un hotel y tampoco nun me corté a la hora de pidir comida. El deséu insaciable de facer too lo que nun había podío antes recordábame a la dómina pospandémica, una dómina na que toos buscábamos, como llocos, viaxar, celebrar y simplemente vivir un poco más depués de tanto tiempu zarraos en casa. Pasé tiempu con Sara y los sos amigos, bebí sidra anque nun debería y quedé mirando l’ocasu dende la habitación del hotel que’l mio dinerín me había costao. Sentíame desafiante, sentíame bien. Yá había tenío la mio primer prueba de la normalidá, pero esta yera la primer prueba de la llibertá —y la primer prueba d’un cachopu decente en bastante tiempu…