Navidá n’España

06.01.25 — Madrid

Navidá n’España

06.01.25 — Madrid

Durante la recuperación dempués de la mio cirugía, tuve la suerte de recibir a muncha xente en casa. Cuando la mio hermana me visitó en diciembre, acabó invitada a acompañame a la cena de Navidá d’Erretres, que terminó siendo una nueche maravillosa. Tenía munches ganes de vela, munches ganes de salir de casa y munches ganes de volver a atopame colos mios compañeros dempués de tanto tiempu.

Tres l’esbarrumbe de la fiesta llegó una mala noticia: nun me dexaben volar a Inglaterra pa pasar les Navidaes. Entré en pánicu ante la posibilidá de pasar la Navidá solo en casa, pero entós llegó Sara pa salgame. Por cuestiones del so trabayu, ella tamién taría en Madrid nesos díes. Asina que montamos un plan pa pasar una Navidá alternativa na mio casa.

Sara acercóse en Nochebuena y pasamos la tarde viendo una película cursi enantes d’echamos a dormir. Al día siguiente esperabaime una sorpresa: un regalu de Sara que me comprara ensin avisame. Nesi momentu alivióme haber incluyío na mio última compra del Mercadona delles tabletas de chocolate de más. Asina, aseguréme de que ella tamién tuviera daqué que abrir.

La nuesa Navidá acabó siendo un día tranquilu y caseru. Decoramos unes galletes de xinxibre y depués preparamos xuntos una comida que xuntaba la cultura culinaria española cola británica. Tomamos llangostinos d’entrante y preparamos un platu que s’averaba a la típica cena de Navidá inglesa. Too ello acompañámoslo con una banda sonora na que dominaben los villancicos de tola vida xunto con dalgunos carols británicos de la mio infancia. Pusimos fin al día de la meyor manera posible: quedándonos fechos sopa nel sofá, con otra película cursi de fondu.

Dempués d’una Navidá tan guapa, atopéme col siguiente drama: ¿cómo pasar la Nochevieya? Entá nun me dexaben salir de Madrid, pero Pedro salvóme con una propuesta perbona. Dimos la bienvenida a 2025 él, la so pareya, la so madre y yo. Foi una nueche mui especial, con una doble celebración, yá que nos dio tiempu a ver los fuegos de Londres enantes de la cuenta atrás de la Puerta del Sol. Foi tamién l’añu nel que descubrí que a los españoles vos presta empezar l’añu con petardos. ¡Casi vuelvo a tener un accidente del sustu!

Presta pensar que supe sacar lo meyor d’una situación mala nesta dómina navidiega, pero nun lo podría haber fecho yo solo. Gustaríame volver espresar el mio agradecimientu y el mio cariñu a Sara, a Pedro y al restu d’amigos y familiares que me acompañaron durante la recuperación. Eché de menos tar en casa, pero la nuesa Navidá española foi daqué bien especial.

Una dómina coixa

30.12.24 — Madrid

Una dómina coixa

30.12.24 — Madrid

Mientres volvía del trabayu pa casa en bici, el coche d’enfrente empezó a frenar, polo que yo fixi lo mesmo… nada fuera de lo normal. Pero’l frenu d’esta bici quedó bloquiáu del too, de manera totalmente inesperada. Esti frenazu dexóme zigzagueando pela cai mientres intentaba recuperar el control. Al final nun pude y, xunto cola bici, caí al suelu.

Lo siguiente foi un borrón. Grité dalgo, un grupu de peatones llevóme hasta’l bordillu, apaecieron dos policías y depués llegó l’ambulancia. El diagnósticu inicial foi un esguince, asina que subí a l’ambulancia a pata coixa y llevaronme al hospital coles sirenes puestes. Ellí fixéronme una serie de pruebes y enfrentáronme cola realidá: tenía’l güesu fechu pedazos. Dixéronme que había que operame y ingresáronme una nueche. Paséla intentando, ensin ésitu nengún, quedame dormíu a pesar de too lo que m’acababa de pasar.

Asina empezó’l primer mes de lo que sería casi mediu añu de recuperación. Mio ma, en cuanto s’enteró de la operación, pilló un vuelu y acabó quedándose conmigo más d’un mes. La so compañía foi imprescindible mientres yo me adaptaba a la mio nueva realidá. Apoyábame a nivel físicu coles xeres más básiques de la casa, y tamién a nivel mental cola conversación ininterrumpida tolos díes.

La operación duró unes tres hores, nes que reconstruyeron tol güesu debaxo la rodilla con plaques y tornillos varios. Aparte de les náusees que me causó saber que tenía la pierna llena de grapes y la mano pinchada cola vía intravenosa, lo peor de tol procesu foi’l dolor y la falta de sueñu que vino depués, nos díes siguientes a la operación.

A pesar del sueñu, el dolor y l’aborrecimientu de les selmanes que siguieron, yo taba optimista. Amás de la compañía que me facía mio ma, una ristra d’amigos pasaben pela mio casa, ente ellos Pedro, Sara, Rhea, Julia y munchos más. Empecé a apreciar más les coses pequeñes que antes daba por feches. Púseme a observar el mio progresu al traviés de los hitos y logros más pequeños. El camín a la recuperación convirtióse nuna especie de xuegu.

Hai muncho más que podría contar y munchísimos detalles que dexé fuera, pero voi dexalo equí. Fueron de los meses más difíciles de la mio vida, pero pude pasalos en gran parte gracies al amor y apoyu que me dieron los mios amigos, la mio familia y, especialmente, mio ma.

Quiérovos muncho a toos.

Vieyes amigues

10.10.24 — Madrid

Vieyes amigues

10.10.24 — Madrid

Seya comer nuggets de pitu na tela de saltu d’un trampolín o represar un regueru pa facer una base secreta nueva, los mios primeros recuerdos de pasar tiempu con amigos son coles hermanes Smith. Dende’l día en que una d’elles apaeció asomando la cabeza per enriba del muru del xardín, Jemma y Lucy fueron siempres les amigues más vieyes mías y de la mio hermana. Somos un grupu inseparable, a pesar de les discutines d’antaño y de les nuestres vides adultes tan atruchaes d’anguaño.

Amás de la dificultá universal d’organizar planes como adultos, los cuatro tenemos que llidiar cola xeografía enrevesada de les nuestres vides. Yo vivo nel estranxeru, Eleanor ta en Leeds, Lucy ta en Burnley y el trabayu de Jemma llévala per tolos llugares. Paecía bien poco probable que consiguiéramos xuntanos nunca los cuatro, y muncho menos que pudiéramos organizar pa que les trés vinieren visitame a Madrid. A pesar de la cuasi imposibilidá, l’añu pasáu vieme nun tren camín del aeropuertu, cegu de la emoción y con un cartel na mano que ponía: «Smith y Briggs».

Lo que vino depués fueron trés díes de caos nel meyor sentíu posible. Puxímonos al día con unes cerveses, falamos hores ente comida y recordamos na mio casa, yá enllena de xente. Ente charres en chigres paseábamos pela ciudá, falando ensin parar como si nun pasara’l tiempu dende aquellos díes en que facíemos tartes de barru y corriemos polos praos detrás de les nuestres cases nos años dos mil.

Tuve’l gustu de facer munchos amigos en toa mena de situaciones y de tolos rincones del mundu a lo llargo de los años, pero agora doi cuenta de que Eleanor y yo tenemos una suerte inmensa de siguir contando con Jemma y Lucy como amigues cercanes. Con elles podemos reínos hasta llorar y ver y volver ver la película de Pippi Calzasllargues pola enésima vegada dende que la descubrimos nun VHS mediu rotu nel salón de los Smith.

Retomar esti contautu tan cercanu coles mios vieyes amigues foi la tónica que necesitaba al llegar al final del branu del añu pasáu. Anque nun tenía manera de sabelo entós, la so visita marcó un parón absolutu antes del baxón que taba por venir. Pero esa historia dexaréla pa la siguiente entrada del blog.

Pa nun cerrar esti viaxe celebratoriu con un tonu negativu, gustaría estender les gracies a Jemma, Lucy y Eleanor por venir a verme y pola so amistá, amor y apoyu. Nun vos imaxináis les ganes que tengo de tenervos otra vegada equí, y tamién muérrome por vervos n’Inglaterra.

Buffalo y Toronto

31.08.24 — Toronto

Buffalo y Toronto

31.08.24 — Toronto

La mio visita a Búfalo entamó con un viaxe d’ocho hores dende Nueva York, nel que Kevin punxose al volante y yo dediquéme a entretenelu con una bona charra. La chapa que-y metí venía empobinada por una barrita de chocolate que mercara nuna gasolinera casi abandonada y que resultó tener una cantidá inquietante de colorantes fluorescentes. Asina, entamé la visita a la casa de Kevin y James como pensaba siguila: falando ensin parar col mio amigu, el Kevin.

Una vegada en Búfalo, llegamos a la conclusión de que yo yá viera y fixera casi too lo que había que ver y facer na mio primer visita, polo que’l plan acabó siendo bien tranquilín. Salía a pasear, fui visitar l’institutu onde trabaya James de profesor y acabé mercando una cantidá obscena d’azucarillos bañados en chocolate nuna tiendina pintoresca del centru de la ciudá.

Un momentu destacáu del viaxe foi una excursión a Six Flags Darien Lake, un parque d’atracciones al que fui con James mentanto Kevin trabayaba. De primeres, el mio oxetivu yera xubime a toles montañes ruses nueves que pudiera, pero tamién resultó ser una oportunidá preciosa de pasar tiempu falando con James ensin que tuviera Kevin. A Kevin quierolu muncho, pero ye verdá que cuando él y yo entamamos a falar, quedamos absortos nel nuesu propiu mundu de conversación.

Pero falar, falar, sí que falamos Kevin y yo cuando él dexóme delantre del hotel de Toronto onde pasaría los últimos díes de les mios vacaciones. Kevin y yo yá visitáramos la ciudá canadiense nuna pequeña escapadina hai unos años, pero esta vuelta tuve la oportunidá d’esplorar un poco más, y lo que atopé prestóme muncho.

Dende los sos callexones enllenos de grafiti hasta la comida callejera deliciosa que se topa nos sos mercaos, Toronto ofrecióme muncho más de lo que nunca hubiera imagináu. Al esplorar la universidá de día y pasear pela oriella del llago de nueche, descubrí que la ciudá recuérdame a una versión más europea de Nueva York. Paecióme un sitiu que xunta lo meyor d’estos dos continentes nuna ufierta vibrante y caótica que me prestó un montón.

Nestos últimos díes del viaxe, enamoréme un poco de Toronto, anque la ciudá intentara matame. Pasé la última nueche ente burbuxes al bañame nel hotel, pero la bañera yera fonda y el suelu bien resbaladizu. Pues imaxínate’l circu…

Gais en Nueva York

17.08.24 — Nueva York

Gais en Nueva York

17.08.24 — Nueva York

El tren de Vermont a NYC iba perbién hasta que la megafonía nos informó de que una ponte ferroviaria quedara atrancada y que teníemos que baxar toos en metá de la nada. Tres d’unos cuantos minutos preguntándome cómo diablos diba llegar entós al mio destín, dixéronnos que tornáramos a xubir: lo de la ponte yá taba arregláu.

La primer nueche na Gran Mazana paséla solu. Xunto con lo que paecía’l restu de la ciudá, paseé pela ponte de Brooklyn mientres el sol se ponía. Decidí volver al hotel a pata, lo que me permitió pillar un perru caliente d’un paisanu rarín que me clavó seis dólares por una salchicha enana. Dempués de pagalos a 25 céntimos en Burlington, quedé enfotáu. Tuve que rematar la cena con una hamburguesa barata del McDonald’s. ¡Vivan los Estaos Xuníos!

Al día siguiente llamé a Kevin mientres paseaba pel Central Park. Él diba conduciendo dende Buffalo pa quedar conmigo en Nueva York y quería compartime la bona noticia: madrugara pa consiguir dos entraes pa ver Chicago en Broadway. A pesar de dexar cuasi tolos mios dólares na taquilla, pasé’l restu de la tarde mirando tiendes pola Quinta Avenida hasta que llegara’l mio amigu, mui queríu y mui tardón.

Col anochecer yá enriba, fuimos a un par de sitios. El primeru foi’l mercáu de DUMBO, un llugar na costa de Brooklyn, xunto a la ponte del mesmu nome. La comida yera cara y la xente mui de postureo, pero foi un bon sitiu pa facese un selfi y demostrar que tuviéramos en NYC. Tenía unes ganes loques de que Kevin probara los sándwiches del Katz’s Delicatessen, asina que esa foi la segunda parada antes d’acabar la nueche con unos helados y un paseu per Manhattan pa sentinos xente guapa.

Llegó la mañana siguiente y con ella la batalla de siempre pa que Kevin se llevantara. Dempués de consiguilo, visitamos xuntos Little Island pa pasalo mal un ratu baxo’l sol del branu mientres yo sacaba delles semeyes. Buscamos refugiu en dalgunos mercaos de la zona, pero los precios fixeron que la nuesa única actividá ellí fuera visitar los sos baños.

Dempués llegó la hora de ver l’espectáculu musical. Los dos gais en Nueva York cantamos, bailamos y gozamos de la pluma a tope. Amábamos cada momentu de la esperiencia, polo que decidimos siguir col mariconeu y acercanos a Stonewall pa tomar dalgo y mover el cuerpu baxo mil lluces de colores.

Esa tarde, optimista y ensin preocuparme muncho pola tormenta que se taba cuayando, insistí en que subiéramos a ún de los ferris municipales. Estos tán pensaos pa quien quier movese ente los distritos de la ciudá, pero pensé que podíemos facer un viaxe d’ida y vuelta pa ver ponese’l sol sobre la ciudá. Como bien te pues imaxinar, nun hubo sol nengún que se punxera baxo tanta nube gris, unes nubes que ceo empezaron a descarganos enriba conforme avanzaba’l viaxe. Al llegar al muelle del final de la ruta tuvimos que correr a toa lleche pa refugiamos debaxo d’una carpa hasta que’l ferri volviera zarpar. Empapaos hasta los güesos, pillamos el barcu de vuelta pal barriu financieru y mercamos dalgo más de comida callejera de calidá más bien dudosa mientres paraba la lluvia.

Foi una nueche completamente caótica pa poner fin al viaxe, como nun podía ser d’otra manera conmigo y con Kevin: somos el caos fechu persona. Ver un musical, esplorar la ciudá y montar tales circos dieron llugar a una estancia emocionante en Nueva York, pero sé bien que Kevin y yo podríemos dir al sitiu más aburríu del planeta (Murcia, por exemplu) y entá asina habría conversación, rises y trastades ensin fin. Namás que habría menos bagels.